မုံရွာ၊ သြဂုတ် ၁၆

စစ်ကိုင်းတိုင်းဒေသကြီး e-Government ဦးစီးကော်မတီ (၁/၂၀၂၄)လုပ်ငန်းညှိနှိုင်း အစည်း အဝေးကို သြဂုတ်လ ၁၆ ရက်၊ နံနက်ပိုင်းက တိုင်းဒေသကြီး အစိုးရအဖွဲ့ရုံး အစည်းအဝေးခန်းမတွင် ကျင်းပရာ အစည်းအဝေးသို့ တိုင်းဒေသကြီး e-Government စနစ် အကောင်အထည်ဖော်ရေးဦးစီးကော်မတီ နာယက၊ တိုင်းဒေသကြီး ဝန်ကြီးချုပ် ဦးမြတ်ကျော်၊ တိုင်းဒေသကြီး e-Government စနစ် အကောင်အထည်ဖော် ရေးလုပ်ငန်းကော်မတီ ဥက္ကဌ၊ ကော်မတီအတွင်းရေးမှူးများနှင့်အဖွဲ့ဝင်များ တက် ရောက်ကြသည်။

ဦးစွာ တိုင်းဒေသကြီး e-Government စနစ် အကောင်အထည်ဖော်ရေး ဦးစီးကော်မတီနာယက၊ တိုင်းဒေသကြီး ဝန်ကြီးချုပ် ဦးမြတ်ကျော်က ဒီဂျစ်တယ်အသွင်ကူးပြောင်း ခြင်းအား ဆောင်ရွက်ခြင်းဖြင့် ပြည်သူများသည် အစိုးရ ၏ ဝန်ဆောင်မှုများ အား Online မှတဆင့် အချိန်မရွေး၊နေရာမရွေး သတင်းအချက်အလက်များကိုရယူ၍ အသုံးချခြင်းအား ဖြင့်အချိန်နှင့်ငွေကြေးကုန်ကျမှုများလျော့နည်း သွားမည်ဖြစ်သည့် အပြင်ဘဏ်လုပ်ငန်း များလည်ပတ်ဆောင်ရွက်မှု၊ ငွေကြေးဆိုင်ရာအချက်အလက်များ အခွန်ကောက်ခြင်းကိစ္စ ရပ်များနှင့် Digital Payment များအား ပိုမိုအသုံးပြုနိုင်မှုများမြှင့်တင်နိုင်ခြင်းဖြင့် အဂတိ တိုက်ဖျက်ရေးကိုပါ အကောင်အထည်ဖော် ဆောင်ရွက်ရာရောက်မည် ဖြစ်ပါကြောင်း၊ မိမိတို့တိုင်းဒေသကြီး အစိုးရအဖွဲ့အနေဖြင့် e-Government စနစ်အားအသုံးပြု ၍ရုံးလုပ်ငန်းစနစ်များ ပိုမိုလွယ်ကူချောမွေ့စွာ ဆောင်ရွက်နိုင်ရေးအတွက် မြန်မာ့ဆက်သွယ်ရေးလုပ်ငန်း(MPT)နှင့် ချိတ်ဆက်၍ နိုင်ငံတော်မှဖော်ဆောင်ထားသည့် EDMS Mail စနစ်အား Communication Center (CC) ရုံးခန်းဖွင့်လှစ်၍ နာဂကိုယ်ပိုင်အုပ် ချုပ်ခွင့်ရဒေ သနှင့် ခရိုင်(၁၃) ခရိုင်မှ ကွန်ပျူတာ ကျွမ်းကျင်ဝန်ထမ်းတစ်ဦးစီဖြင့် ရုံးလုပ်ငန်းများအား ဆောင်ရွက်လျက်ရှိပါကြောင်း၊ တာဝန်ရှိသူအားလုံးအနေဖြင့် ပြည်သူဗဟိုပြုသည့် e-Government ဝန်ဆောင်မှုများ ဖွံ့ဖြိုးတိုးတက်လာစေရေးအတွက် မျက်ခြေမပျက် ကြိုး ပမ်းဆောင်ရွက်သွားကြရန် လိုအပ်ပါကြောင်း ပြောကြားခဲ့သည်။

ယင်းနောက် တိုင်းဒေသကြီး e-Government စနစ် အကောင် အထည်ဖော်ရေး လုပ်ငန်းကော်မတီ ဥက္ကဌ၊ တိုင်းဒေသကြီး လမ်းပန်းဆက်သွယ်ရေးဝန်ကြီးက တိုင်းဒေ သကြီးအတွင်း e-Government စနစ် အကောင်အထည်ဖော်ရေးလုပ်ငန်းများ ဆောင် ရွက်နေမှု အခြေအနေများအား ရှင်းလင်းပြောကြားသည်။

ဆက်လက်ပြီး တိုင်းဒေသကြီး e-Government စနစ် အကောင်အထည်ဖော်ရေး လုပ်ငန်းကော်မတီ အတွင်းရေးမှူး ကွန်ပျူတာတက္ကသိုလ်(မုံရွာ)ပါမောက္ခချုပ်နှင့် တွဲဖက် အတွင်းရေးမှူး တိုင်းဒေသကြီးအစိုးရအဖွဲ့ ညွှန်ကြားရေးမှူးတို့က တိုင်းဒေသကြီး အတွင်းရှိ ခရိုင်/မြို့နယ်များတွင် e-Government စနစ် အကောင်အထည်ဖော်ရေး လုပ် ငန်းများ အောင်မြင်အောင်ဆောင်ရွက်နေမှုများနှင့် ဆက်လက်ဆောင်ရွက်သွားမည့် လုပ် ငန်းအခြေအနေများအား Power Point ဖြင့် ရှင်းလင်းဆွေးနွေး တင်ပြကြသည်။

ထို့နောက် တိုင်းဒေသကြီး e-Government စနစ် အကောင်အထည်ဖော်ရေး လုပ်ငန်းကော်မတီ အဖွဲ့ဝင်များက မိမိတို့ဌာနများအလိုက် တိုင်းဒေသကြီးအတွင်း e-Government စနစ်အကောင်အထည်ဖော်ရေးလုပ်ငန်းများ ဆောင်ရွက်နေမှု အခြေအနေ များနှင့် ပတ်သက်၍ ရှင်းလင်းဆွေးနွေး တင်ပြကြသည်။

ဆက်လက်ပြီး တိုင်းဒေသကြီး အစိုးရအဖွဲ့ဝင်များက တိုင်းဒေသကြီးအတွင်း e-Government စနစ် အကောင်အထည်ဖော်ရေးလုပ်ငန်းများ ဆောင်ရွက်နေမှုမှုနှင့် လိုအပ်သည်များ ဖြည့်ဆွက်ဆွေးနွေး တင်ပြကြသည်။

ထို့နောက် တိုင်းဒေသကြီး e-Government စနစ် အကောင်အထည်ဖော်ရေး ဦးစီး ကော်မတီ နာယက၊ တိုင်းဒေသကြီး ဝန်ကြီးချုပ်က အစည်း အဝေးသို့တက် ရောက်လာသူများ၏ အကြံပြုဆွေးနွေးတင်ပြချက်များအပေါ် လိုအပ်သည်များကို တာဝန်ရှိသူများနှင့် ဖြည့်ဆည်းပေါင်းစပ် ဆောင်ရွက်ပေးခဲ့ပြီး နိဂုံးချုပ်စကားပြောကြားခဲ့ကြောင်း သိရသည်။

မုံရွာ၊ သြဂုတ် ၁၅

၂၀၂၄-ခုနှစ်၊ တိုင်းဒေသကြီးနှင့်ပြည်နယ် အသက်(၁၈)နှစ်အောက် အမျိုးသား/ အမျိုးသမီး ပြေးခုန်ပစ်ပြိုင်ပွဲသို့ ဝင်ရောက်ယှဉ်ပြိုင်မည့် စစ်ကိုင်းတိုင်းဒေသကြီး ပြေးခုန် ပစ်အသင်းအား အောင်နိုင်ရေးအလံပေးအပ်ပွဲ အခမ်းအနားကို သြဂုတ်လ ၁၅ ရက်၊ မွန်းလွဲပိုင်းတွင် မုံရွာမြို့၊ ပြည်သူ့အားကစားကွင်းအတွင်းရှိ မိုးလုံလေလုံအားကစားခန်း မတွင်ကျင်းပရာ အခမ်းအနားသို့ တိုင်းဒေသကြီး ဝန်ကြီးချုပ် ဦးမြတ်ကျော်၊ တိုင်းဒေ သကြီး တရားသူကြီးချုပ်၊ တိုင်းဒေသကြီး အစိုးရအဖွဲ့ဝင်များ၊ တိုင်းဒေသကြီး/ခရိုင်/မြို့ နယ်အဆင့် ဌာနဆိုင်ရာများ၊ ပြိုင်ပွဲဝင်အသင်းအုပ်ချုပ်သူများ၊နည်းပြများနှင့် အားကစား သမားများ တက်ရောက်ကြသည်။

ဦးစွာ တိုင်းဒေသကြီး ဝန်ကြီးချုပ် ဦးမြတ်ကျော်က နိုင်ငံတော်အစိုးရအနေဖြင့် အားကစားကို အမျိုးသားရေးတာဝန်တစ်ရပ်အနေဖြင့် အဘက်ဘက်မှ အားပေးမြှင့်တင် ဆောင်ရွက်လျက်ရှိရာ မိမိတို့တိုင်းဒေသကြီး အစိုးရအနေဖြင့်လည်း အားကစားမူဝါဒများ အားအကောင်အထည်ဖော်နိုင်ရန်အတွက် တာဝန်ရှိသူများနှင့်အတူ အစွမ်းကုန်ပူးပေါင်း ဆောင်ရွက်လျက် ရှိပါကြောင်း၊ ပြေးခုန်ပစ်အားကစားနည်းသည် မိမိတို့တိုင်းဒေသကြီး အတွက် ဆုတံဆိပ်ပေါင်းများစွာ ဆွတ်ခူးပေးသည့် အားကစားနည်းတစ်ခုဖြစ်ပါကြောင်း၊ ၂၀၂၃-ခုနှစ်၊ စိန်ရတုလွတ်လပ်ရေးနေ့ အထိမ်းအမှတ် နိုင်ငံတော်စီမံအုပ်ချုပ်ရေးကောင်စီ ဥက္ကဌဖလား တံခွန်စိုက်ဒုတိယဆုနှင့် ၂၀၂၃-၂၀၂၄ ခုနှစ်တွင် အမျိုးသားတံခွန်စိုက်ဆုများ ရရှိခဲ့ပါကြောင်း၊ မိမိတို့တိုင်းဒေသကြီး ပြေးခုန်ပစ်အသင်း လက်ရွေးစင်အားကစားသမားများအနေ ဖြင့်ယခင်နှစ်များမှရရှိခဲ့သည့် အောင်မြင်မှုများအား ဆက်လက်ထိန်းသိမ်းပြီး အနိုင်မခံ အရှုံးမပေးသည့်ဇွဲစိတ်ဓါတ်ဖြင့် တစ်ဦးချင်းနှင့်အသင်းလိုက်ပြိုင်ပွဲများတွင် အောင်မြင်မှု များပိုမိုရရှိအောင် အစွမ်းကုန်ကြိုးစားယှဉ်ပြိုင်သွားကြရန် လိုအပ်ပါကြောင်း ပြောကြား ခဲ့သည်။

ယင်းနောက် တိုင်းဒေသကြီး ဝန်ကြီးချုပ်က ၂၀၂၄-ခုနှစ်၊ တိုင်းဒေသကြီးနှင့်ပြည် နယ်အသက်(၁၈)နှစ်အောက် အမျိုးသား/အမျိုးသမီး ပြေးခုန်ပစ်ပြိုင်ပွဲသို့ ဝင်ရောက်ယှဉ် ပြိုင်မည့် တိုင်းဒေသကြီး ပြေးခုန်ပစ်အသင်းနည်းပြများနှင့် အသင်းအုပ်ချုပ်သူများထံ ဂုဏ်ပြုထောက်ပံ့ငွေကျပ် - ၁၁၄,၀၀,၀၀၀ (တစ်ရာတစ်ဆယ့်လေးသိန်းကျပ်)နှင့် အောင် နိုင်sရေးအလံတို့အား ပေးအပ်သည်။

ဆက်လက်ပြီး တိုင်းဒေသကြီး ပြေးခုန်ပစ်အသင်းအုပ်ချုပ်သူက တိုင်းဒေသကြီး နှင့်ပြည်နယ် အသက်(၁၈)နှစ်အောက် အမျိုးသား/အမျိုးသမီး ပြေးခုန်ပစ်ပြိုင်ပွဲသို့ ဝင် ရောက်ယှဉ်ပြိုင်သွားမည့် အခြေအနေများအား ရှင်းလင်းပြောကြားပြီး စုပေါင်းမှတ်တမ်း တင်ဓါတ်ပုံ ရိုက်ကူးကြသည်။

ထို့နောက် တိုင်းဒေသကြီး ဝန်ကြီးချုပ်နှင့် တာဝန်ရှိသူများက တိုင်းဒေသကြီး ပြေး ခုန်ပစ်အသင်း အားကစားသမားများ၊ အသင်းနည်းပြများနှင့် အုပ်ချုပ်သူများအား ရင်းရင်း နှီးနှီးလိုက်လံနှုတ်ဆက် အားပေးစကားများပြောကြားခဲ့ကြောင်း သိရသည်။

မုံရွာ၊ သြဂုတ် ၁၄

အသေးစားစက်မှုလက်မှုလုပ်ငန်းများ စနစ်တကျထွန်းကားစေပြီး ကျေးလက်နေ ပြည်သူများ၏ လူမှုစီးပွားဘဝများ စဉ်ဆက်မပြတ် ဖွံ့ဖြိုးတိုးတက်လာစေရန် စီမံဆောင် ရွက်ပေးခြင်းဖြင့် မြို့ပြနှင့်ကျေးလက်များအကြား ဖွံ့ဖြိုးမှုကွာဟချက် ကျဉ်းမြောင်းစေရန် ရည်ရွယ်၍ စစ်ကိုင်းတိုင်းဒေသကြီး အသေးစားကုန်ထုတ်လုပ်ငန်းများ ဖန်တီးပေးရေးနှင့် ကျေးလက်နေမိသားစုဝင်ငွေ တိုးတက်ရေးစီမံကိန်းလုပ်ငန်းပါ အခြေခံစက်ချုပ်နည်းပ ညာသင်တန်းဆင်းပွဲ အခမ်းအနားကို သြဂုတ်လ ၁၄ ရက်၊ နံနက်ပိုင်းတွင် တိုင်းဒေသကြီး အသေးစားစက်မှုလက်မှုလုပ်ငန်းဦးစီးဌာနရုံးရှိ လေ့ကျင့်ပျိုးထောင်ရေးစင်တာ၌ ကျင်းပ ရာသင်တန်းဆင်းပွဲ အခမ်းအနားသို့ တိုင်းဒေသကြီး ဝန်ကြီးချုပ် ဦးမြတ်ကျော်၊ တိုင်းဒေသကြီး အစိုးရအဖွဲ့ဝင်များ၊ တိုင်းဒေသကြီး/ခရိုင်/မြို့နယ်အဆင့် ဌာနဆိုင်ရာများ၊ သင်တန်းနည်းပြများနှင့် သင်တန်းသူများ တက်ရောက်ကြသည်။

ဦးစွာ တိုင်းဒေသကြီး ဝန်ကြီးချုပ် ဦးမြတ်ကျော်က အသေးစားကုန်ထုတ်လုပ်ငန်း များထူထောင်ပေးခြင်းဖြင့် ကျေးလက်နေပြည်သူများအား အလုပ်အကိုင်အခွင့် အလမ်း များပါဖန်တီးပေးနိုင်ပြီး နေရပ်စွန့်ခွာရွှေ့ပြောင်းခြင်းနှင့် ပို့ကုန်မြှင့်တင်ရေးအား တိုက် ရိုက်ထောက်အကူဖြစ်စေမည် ဖြစ်ပါကြောင်း၊ ယခုသင်ကြားပေးလိုက်သည့် စက်ချုပ်အ တတ်ပညာများကိုအခြေခံပြီး ကိုယ်ပိုင်လုပ်ငန်းထူထောင် လုပ်ကိုင်ရာတွင် အောင်မြင် အောင်လုပ်ကိုင် ဆောင်ရွက်နိုင်ရန်အတွက်လည်း မွမ်းမံစက်ချုပ်နည်းပညာသင်တန်းကို လည်း ဆက်လက်သင်ကြားပို့ချသွားမည် ဖြစ်ပါကြောင်း၊ ယခုတက်ရောက်ခဲ့သည့် သင် တန်းသူများထဲမှ ထူးချွန်ပြီးအမှန်တကယ် လုပ်ငန်းထူထောင်လိုသည့် သင်တန်းသူ(၅)ဦး အားရွေးချယ်ပြီး တစ်ဦးလျှင် ကျပ်(၁၄)သိန်းဖိုးနှင့်ညီမျှသည့် လုပ်ငန်းသုံးပစ္စည်းများအား ငှားရမ်းအသုံးပြုခွင့်ပေးသွားမည် ဖြစ်ပါကြောင်း၊ မိသားစုဝင်ငွေတိုးရေးစီမံကိန်းပါ အခြေ ခံစက်ချုပ်နည်းပညာသင်တန်းတွင် ကိုယ်စွမ်းဉာဏ်စွမ်းရှိသ၍ ကြိုးကြိုးစားစားလေ့လာ သင်ယူခဲ့ကြသလို မွမ်းမံစက်ချုပ်နည်းပညာ သင်တန်းတွင်လည်း ယခုလိုပဲကြိုးစားလေ့ လာသင်ယူသွားကြရန် လိုအပ်ပါကြောင်း၊ သင်တန်းသူများအနေဖြင့် ကိုယ်ပိုင်လုပ်ငန်း ထူထောင်ပြီး နေ့စဉ်ဝင်ငွေရရှိအောင်စွမ်းဆောင်နိုင်ကြပြီး အောင်မြင်သည့်အသေးစား၊ အငယ်စား စီးပွားရေးလုပ်ငန်းရှင်များ ဖြစ်လာကြမည်ဖြစ်ပါကြောင်း ပြောကြားခဲ့သည်။

ယင်းနောက် တိုင်းဒေသကြီး ဝန်ကြီးချုပ်က သင်တန်းသူတစ်ဦးထံ သင်တန်းဆင်း လက်မှတ်များအားပေးအပ်ပြီး တိုင်းဒေသကြီး စီးပွားရေးရာဝန်ကြီး ဒေါ်ရီရီသန်းထံ သင် တန်းသူတစ်ဦးက သင်တန်းမှရရှိသည့် ထုတ်ကုန်ပစ္စည်းများအား ပေးအပ်သည်။

ဆက်လက်၍ သင်တန်းသူများကိုယ်စား သင်တန်းသူတစ်ဦးက ကျေးဇူးတင်စကား ပြန်လည်ပြောကြားပြီး စုပေါင်းမှတ်တမ်းတင် ဓါတ်ပုံရိုက်ကူးကြသည်။

ထို့နောက် တိုင်းဒေသကြီး ဝန်ကြီးချုပ်နှင့် တာဝန်ရှိသူများက သင်တန်းသူများ ကိုယ်တိုင်ချုပ်လုပ်ထားသော အဝတ်အထည်များအား လိုက်လံကြည့်ရှုခဲ့ကြောင်း သိရ သည်။

မုံရွာ၊ သြဂုတ် ၁၃

စစ်ကိုင်းတိုင်းဒေသကြီး ကလေးအလုပ်သမားပပျောက်ရေးဆိုင်ရာ အလုပ်အကိုင်အခွင့် အလမ်း များ ဖန်တီးပေးရေးကော်မတီမှ ဖွင့်လှစ်သည့် လူသုံးကုန်ထုတ်လုပ်မှုနည်းပညာသင်တန်းအမှတ်စဉ် (၂/၂၀၂၄)ဖွင့်ပွဲ အခမ်းအနားကို သြဂုတ်လ ၁၃ ရက်၊ နံနက်ပိုင်းတွင် တိုင်းဒေသကြီးအစိုးရအဖွဲ့ရုံးဝန်းအတွင်းရှိ ချင်းတွင်းခန်းမတွင် ကျင်းပရာ အခမ်းအနားသို့ တိုင်းဒေသကြီး ဝန်ကြီးချုပ် ဦးမြတ်ကျော်၊ တိုင်းဒေသကြီး တရားသူကြီးချုပ်၊ တိုင်းဒေသကြီး အစိုးရအဖွဲ့ ဝင်များ၊ တိုင်းဒေသကြီး/ခရိုင်/မြို့နယ်အဆင့် ဌာနဆိုင်ရာများ၊ သင်တန်းနည်းပြများနှင့် သင်တန်းသူများ တက်ရောက်ကြသည်။

ဦးစွာ တိုင်းဒေသကြီး ဝန်ကြီးချုပ် ဦးမြတ်ကျော်က မိမိတို့တိုင်းဒေသကြီး ကလေးအလုပ် သမားပပျောက်ရေး ကော်မတီအနေဖြင့် ကလေးအလုပ်သမားပပျောက်ရေးဆိုင်ရာ အမျိုးသား အဆင့်လုပ်ငန်းစီမံချက်ပါ ရည်မှန်းချက်များဖြစ်သည့် “ခိုင်မာတိကျသောအခြေခံအချက်အလက် များကောက်ယူခြင်း၊ အသိပညာပေးခြင်းနှင့် စွမ်းဆောင်ရည်မြှင့်တင်ခြင်း၊ ပညာရေး၊ အသက်မွေး ဝမ်းကြောင်းပညာအခွင့်အလမ်းများ ဖန်တီးပေးခြင်း၊ ဥပဒေပိုင်းဆိုင်ရာပြုပြင်ရေးဆွဲမှုနှင့် အကောင်အထည်ဖော်ဆောင်ရွက်မှု ပိုမိုအားကောင်းလာစေခြင်း၊ အဆိုးရွားဆုံးပုံစံဖြင့် ခိုင်းစေ ခြင်းခံရသော ကလေးအလုပ်သမားများအားဖယ်ရှားခြင်းနှင့် ပြန်လည်ကုစားခြင်း၊ မိသားစု အတွက်ပိုမိုကောင်းမွန်သော အသက်မွေး ဝမ်းကျောင်း အလုပ်အကိုင်များရရှိစေခြင်း” အား အောင်မြင်စေရန်အတွက်ကော်မတီ(၈)ရပ်ဖြင့် လုပ်ငန်းများဆောင်ရွက်လျက်ရှိပါကြောင်း၊ လူငယ်များနှင့် ကလေးသူငယ်များဖွံ့ဖြိုးမှု အခန်းကဏ္ဍသည် နိုင်ငံတစ်နိုင်ငံ၏ အနာဂတ် ပုံရိပ်အား ဖန်တီးပေးရာတွင် အလွန်အရေးကြီးသည့်အတွက် လူငယ်များနှင့်ကလေးများသည် နိုင်ငံ၏တန်ဖိုးမဖြတ်နိုင်သည့် အရင်းအမြစ်များ ဖြစ်ပါကြောင်း၊ နိုင်ငံ၏ဖွံ့ဖြိုးတိုးတက်မှု၊ လူနေမှုဘဝမြင့်မားမှု၊ ပညာရေးဖွံ့ဖြိုးတိုးတက်မှုစသည့် စိန်ခေါ်မှုများ သည် ကလေးအလုပ်သမားများ အသုံးပြုနေသည့် အဓိကအခြေခံအကြောင်းအရင်း ဖြစ်သည့်အတွက် တိုက်ရိုက်ဆက်စပ်နေ ပါကြောင်း၊ ထို့ကြောင့်နိုင်ငံတော်မှ အမျိုးသားအဆင့် ကလေးအလုပ် သမားပပျောက်ရေးဆိုင်ရာ လုပ်ငန်းစီမံချက်များရေးဆွဲပြီး အကောင်အထည် ဖော်ဆောင်ရွက်နေပါကြောင်း၊ မိမိတို့တိုင်းဒေသကြီးအစိုးရအဖွဲ့အနေဖြင့် မိမိဒေသနှင့်ကိုက်ညီမှု ရရှိစေမည့် အသက်မွေးမှုနှင့် ကျွမ်းကျင်မှုသင်တန်းများအား စဉ်ဆက်မပြတ် ဖွင့်လှစ်ပေးသွားရန် စီစဉ်ဆောင်ရွက် ထားရှိပါကြောင်း၊ ယခုဖွင့်လှစ်မည့် လူသုံးကုန်ထုတ်လုပ်မှု နည်းပညာသင်တန်းသည်လည်း အလုပ်အကိုင်အခွင့်အလမ်းများ ရရှိနိုင်သည့်အတွက် သင်တန်းသူများအနေဖြင့် စာတွေ့၊ လက်တွေ့သင်ကြားနိုင်သည့် အခွင့်အရေးများရရှိမှာဖြစ်သည့်အတွက်တန်ဖိုးရှိသည့် သင်တန်းတစ်ခု ဖြစ်ပါကြောင်းနှင့် ယခုသင်တန်းမှ သင်ကြားပေးမည့်ပညာရပ်များဖြင့် အလုပ်အကိုင်အခွင့် အလမ်းရရှိပြီး အောင်မြင်သည့် လူမှုစီးပွားဘဝများ တည်ဆောက်နိုင်ကြပါစေကြောင်း ပြော ကြားခဲ့သည်။

ယင်းနောက် တိုင်းဒေသကြီး ဝန်ကြီးချုပ်က တိုင်းဒေသကြီး အလုပ်သမားညွှန်ကြားရေးဦးစီးဌာန ညွှန်ကြားရေးမှူးထံ လူသုံးကုန်ထုတ်လုပ်မှုနည်းပညာ သင်တန်းဖွင့်လှစ်ရန်အတွက် ထောက်ပံ့ငွေကျပ် - ၁၉၅၇၅၀၀/- (တစ်ဆယ့်ကိုးသိန်း ငါးသောင်းခုနှစ်ထောင့်ငါးရာ)ကျပ်အား ပေးအပ်သည်။

ဆက်လက်ပြီး တိုင်းဒေသကြီး အသေးစားစက်မှုလက်မှုလုပ်ငန်းဦးစီးဌာန ညွှန်ကြားရေးမှူး ဦးအောင်မောင်းက သင်တန်းဖွင့်လှစ်ရခြင်းနှင့် ပတ်သက်၍ ရှင်းလင်းပြောကြားပြီး စုပေါင်း မှတ်တမ်းတင် ဓါတ်ပုံရိုက်ကူးကြသည်။

ထို့နောက် တိုင်းဒေသကြီး ဝန်ကြီးချုပ်နှင့် တာဝန်ရှိသူများက လူသုံးကုန်ထုတ်လုပ်မှု နည်းပညာသင်တန်းတွင် အသုံးပြုသွားမည့် သင်ထောက်ကူပစ္စည်းများအား လိုက်လံကြည့်ရှု ခဲ့ကြပြီး အခမ်းအနားသို့ တက်ရောက်လာသူများအား ရင်းရင်းနှီးနှီး နှုတ်ဆက်ခဲ့ကြသည်။

အဆိုပါ လူသုံးကုန်ထုတ်လုပ်မှုနည်းပညာသင်တန်းအား ရက်သတ္တပတ် ၁ ပတ်ကြာ စာတွေ့လက်တွေ့ သင်ကြားပို့ချပေးသွားမည်ဖြစ်ပြီး သင်တန်းသူ ၃၉ ဦး တက်ရောက်သင်ကြား သွားမည်ဖြစ်ကြောင်း သိရသည်။

မုံရွာ၊ သြဂုတ် ၁၂

စစ်ကိုင်းတိုင်းဒေသကြီး ၂၀၂၄-ခုနှစ်၊ အပြည်ပြည်ဆိုင်ရာ လူငယ်များနေ့အခမ်းအနားကို သြဂုတ်လ ၁၂ ရက်၊ နံနက်ပိုင်းတွင် တိုင်းဒေသကြီး အစိုးရအဖွဲ့ရုံးဝန်းအတွင်းရှိ ချင်းတွင်းခန်းမ တွင်ကျင်းပရာ အခမ်းအနားသို့ တိုင်းဒေသကြီး လူငယ်ရေးရာကော်မတီ ဥက္ကဌ၊ တိုင်းဒေသကြီး ဝန်ကြီးချုပ် ဦးမြတ်ကျော်၊ တိုင်းဒေသကြီး တရားသူကြီးချုပ်၊ တိုင်းဒေသကြီး အစိုးရအဖွဲ့ဝင်များ၊ တိုင်းဒေသကြီး/ခရိုင်/မြို့နယ်အဆင့် ဌာနဆိုင်ရာများ၊ မုံရွာမြို့ပေါ်ရှိ တက္ကသိုလ်/ဒီဂရီကောလိပ်၊ သူနာပြုနှင့်သားဖွားသင်တန်းကျောင်း(မုံရွာ)၊ အားကစားနှင့်ကာယပညာသိပ္ပံ(မုံရွာ)နှင့် အခြေခံ ပညာကျောင်းများမှ ဆရာ၊ဆရာမများ၊ ကျောင်းသား၊ကျောင်းသူများ တက်ရောက်ကြသည်။

ဦးစွာ မုံရွာပညာရေးဒီဂရီကောလိပ်မှ လူငယ်များက “လူငယ်စွမ်းရည်” ဂုဏ်ပြုတေးသီ ချင်းဖြင့် ကပြဖျော်ဖြေ၍ အခမ်းအနားအား ဖွင့်လှစ်ကြသည်။

ယင်းနောက် တိုင်းဒေသကြီး လူငယ်ရေးရာကော်မတီ ဥက္ကဌ၊ တိုင်းဒေသကြီး ဝန်ကြီးချုပ် ဦးမြတ်ကျော်က အပြည်ပြည်ဆိုင်ရာ လူငယ်များနေ့သည် ကမ္ဘာ့ကုလသမဂ္ဂပါအဝင် နိုင်ငံအား လုံးကလူငယ်များအားလုံးကို အသိအမှတ်ပြုတန်ဖိုးထားပါကြောင်း၊ လူငယ်များ၏အရေးပါ မှုအားအသိအမှတ်ပြုပြီး ခေတ်ကာလအခြေအနေအားထင်ဟပ်သည့် ဆောင်ပုဒ်အသီးသီးဖြင့် နှစ်စဉ်ကျင်းပလျှက်ရှိရာတွင် ယခုနှစ်အတွက် အပြည်ပြည်ဆိုင်ရာလူငယ်များနေ့ ဆောင်ပုဒ် အဖြစ် “စဉ်ဆက်မပြတ်ဖွံ့ဖြိုး တိုးတက်ရေးလူငယ်များရဲ့ဒစ်ဂျစ်တယ်ကျွမ်းကျင်မှုဖြင့်ဖော် ဆောင်ပေး”ဖြစ်ပါကြောင်း၊ တိုင်းဒေသကြီး လူငယ်ရေးရာကော်မတီအနေဖြင့်လည်း မိမိတို့ တိုင်းဒေသကြီးအတွင်း ကျောင်းနေအရွယ်လူငယ်လူရွယ်များသာမကဘဲ ပညာဆက်လက် သင် ယူနိုင်ခြင်းမရှိသည့် ကျောင်းပြင်ပနေလူငယ်များ၏ အလုပ်အကိုင်အခွင့်အလမ်းများ ပိုမိုရရှိစေ နိုင်ရန်အသက်မွေးဝမ်းကျောင်း သင်တန်းများအားဖွင့်လှစ်ခြင်းနှင့် အားကစားသင်တန်းများ အပါအဝင်ကဏ္ဍအလိုက် လူငယ်ဘက်စုံဖွံ့ဖြိုးရေးသင်တန်းများကို ဖွင့်လှစ်ပေးလျှက်ရှိပါ ကြောင်း၊ လူငယ်များသည် နိုင်ငံတစ်နိုင်ငံ၏ အနာဂတ်ဖြစ်သည်နှင့်အညီ အနာဂတ်ကြယ်ပွင့် ကလေးများ၏ ဖွံ့ဖြိုးတိုးတက်မှုသည် နိုင်ငံတော်ဖွံ့ဖြိုးတိုးတက်မှုဖြစ်ပြီး လူငယ်များဘက်စုံဖွံ့ ဖြိုးတိုးတက်ရေး လုပ်ငန်းများအား တာဝန်ရှိသူများအပါအဝင် မျိုးဆက်သစ်၊ မျိုးဆက်ဟောင်း များ၏ စုစည်းညီညွတ်မှုစွမ်းအားဖြင့် ဘက်ပေါင်းစုံမှဟန်ချက်ညီညီ ဝိုင်းဝန်းပူးပေါင်းဆောင် ရွက်သွားကြရန် လိုအပ်ပါကြောင်း၊ အနာဂတ်တွင်ကျန်းမာကြံ့ခိုင်သော၊ ကိုယ်ကျင့်တရားကောင်း မွန်သော၊ တိုင်းချစ်ပြည်ချစ်စိတ်ရှိသော၊ တာဝန်ယူမှု၊တာဝန်ခံမှုရှိသော လူ့ကျင့်ဝတ်လူ့တန်ဖိုး များအားအလေးထား၍ စိတ်ဓါတ်စည်းကမ်းကောင်းမွန်သည့် လူကောင်းလူတော်များ မွေးထုတ် ပေးနိုင်မည်ဖြစ်ပါကြောင်း၊ ဘက်စုံထူးချွန်သည့် ယင်းလူငယ်များ၏စွမ်းပကားဖြင့် သက်ရွယ်စုံညီ ပါဝင်သော လူမှုစီးပွားဘဝသာယာဖွံ့ဖြိုးတိုးတက်သည့် သဟဇာတဖြစ်သော အနာဂတ်လူ့ ဘောင်အဖွဲ့အစည်းအား ဖန်တီးပုံဖော်နိုင်မည် ဖြစ်ပါကြောင်း ပြောကြားခဲ့သည်။

ထို့နောက် တိုင်းဒေသကြီး ဝန်ကြီးချုပ်က ၂၀၂၄-ခုနှစ်၊ အပြည်ပြည်ဆိုင်ရာလူငယ်များနေ့ အထိမ်းအမှတ် စာစီစာကုံးပြိုင်ပွဲတွင် ပထမ၊ ဒုတိယ၊ တတိယဆုရရှိကြသူများအား လည်း ကောင်း၊ တိုင်းဒေသကြီး တရားသူကြီးချုပ်က ၂၀၂၄-ခုနှစ်၊ အပြည်ပြည်ဆိုင်ရာလူငယ်များနေ့ အထိမ်းအမှတ် စကားရည်လုပြိုင်ပွဲတွင် ပထမ၊ ဒုတိယ၊ တတိယဆုရရှိကြသူများအား လည်း ကောင်း ဂုဏ်ပြုဆုငွေများ အသီးသီးပေးအပ် ချီးမြှင့်ကြသည်။

ဆက်လက်ပြီး တိုင်းဒေသကြီး ဝန်ကြီးချုပ်နှင့် တာဝန်ရှိသူများက မုံရွာစီးပွားရေး တက္က သိုလ်မှ ကျောင်းသား၊သူများနှင့် မသန်စွမ်းလူငယ်တစ်ဦးတို့က တိုင်းရင်းသားစည်း လုံးညီညွတ် မှုအာ ဖော်ဆောင်ထားသည့် တေးသီချင်းများဖြင့် ကပြသီဆိုဖျော်ဖြေမှုများအား ကြည့်ရှုအားပေး ကြသည်။
ထို့နောက် တိုင်းဒေသကြီး လုံခြုံရေးနှင့်နယ်စပ်ရေးရာ ဝန်ကြီးက ၂၀၂၄-ခုနှစ်၊ အပြည် ပြည်ဆိုင်ရာလူငယ်များနေ့ အခမ်းအနားတွင် ကပြသီဆိုဖျော်ဖြေတင်ဆက်သွားကြသည့် လူငယ် များအား ဂုဏ်ပြုဆုငွေများပေးအပ်ချီးမြှင့်ပြီး ၂၀၂၄-ခုနှစ်၊ အပြည်ပြည်ဆိုင်ရာလူငယ်များနေ့ အထိမ်းအမှတ် စကားရည်ပြိုင်ပွဲတွင် ပထမဆုရရှိခဲ့သည့် မုံရွာတက္ကသိုလ်မှ ကျောင်းသား၊သူ များက ပြန်လည်တင်ဆက်ကြသည်။

ဆက်လက်ပြီး တိုင်းဒေသကြီး ဝန်ကြီးချုပ်နှင့် တာဝန်ရှိသူများက ၂၀၂၄-ခုနှစ်၊ အပြည် ပြည်ဆိုင်ရာလူငယ်များနေ့ အထိမ်းအမှတ် လူငယ်လှုပ်ရှားမှု Video Clip အား ကြည့်ရှုအားပေး ပြီးတာဝန်ရှိသူများနှင့်အတူ စုပေါင်းမှတ်တမ်းတင် ဓါတ်ပုံရိုက်ကူးကာ အခမ်းအနားသို့ တက် ရောက်လာကြသည့် လူငယ်များအား ရင်းရင်းနှီးနှီးလိုက်လံ နှုတ်ဆက်ခဲ့ကြသည်။

ဆက်လက်၍ တိုင်းဒေသကြီး ဝန်ကြီးချုပ်နှင့် တာဝန်ရှိသူများက ပြန်ကြားရေးနှင့်ပြည် သူ့ဆက်ဆံရေးဦးစီးဌာနပြခန်း၊ မူးယစ်ဆေးဝါးတားဆီးနှိမ်နှင်းရေးရဲတပ်ဖွဲ့ပြခန်း၊ အားကစားနှင့် ကာယပညာဦးစီးဌာန၊ အားကစားနှင့်လူငယ်ရေးရာကဏ္ဍပြခန်း၊ လူဝင်မှုကြီးကြပ်ရေးနှင့် ပြည် သူ့အင်အားဝန်ကြီးဌာနပြခန်း၊ ပတ်ဝန်းကျင်ထိန်းသိမ်းရေးဦးစီးဌာနပြခန်း၊ မီးသတ်ဦးစီးဌာနပြ ခန်းများအား လိုက်လံကြည့်ရှုအားပေးခဲ့ကြသည်။

ဆက်လက်ပြီး ၂၀၂၄-ခုနှစ်၊ အပြည်ပြည်ဆိုင်ရာလူငယ်များနေ့ အထိမ်းအမှတ် လူငယ် စကားဝိုင်းကိုကျင်းပရာ မုံရွာမြို့ပေါ်ရှိ တက္ကသိုလ်/ဒီဂရီကောလိပ်များမှ ကျောင်းသား/သူများ၊ သူနာပြုနှင့်သားဖွားသင်တန်းကျောင်း(မုံရွာ)မှ သင်တန်းသား/သူများက “ဗလငါးတန်”ခေါင်း စဉ်ဖြင့်ဆွေးနွေးပြီး အခမ်းအနားသို့ တက်ရောက်လာကြသည့်လူငယ်များက သိရှိလိုသည်များ မေးမြန်းကြကာ တာဝန်ရှိသူများက ပြန်လည်ဖြေကြားပြီး စကားဝိုင်းသို့တက်ရောက်လာသူများ အား နေ့လည်စာထမင်းဗူးများ ဝေငှခဲ့ကြောင်း သိရသည်။

မုံရွာ၊ သြဂုတ် ၁၁

စစ်ကိုင်းတိုင်းဒေသကြီး ဝန်ကြီးချုပ် ဦးမြတ်ကျော်၊ တိုင်းဒေသကြီး အစိုးရအဖွဲ့ဝင်များ နှင့်တိုင်းဒေသကြီးအဆင့် ဌာနဆိုင်ရာများသည် ယမန်နေ့၊ နံနက်ပိုင်းတွင် တိုင်းဒေသကြီးအစိုး ရအဖွဲ့မှ မုံရွာမြို့အားမြို့အင်္ဂါရပ်နှင့်အညီ ဖွံ့ဖြိုးတိုးတက်စေရေးအတွက် လယ်တီရပ်ကွက်ရှိ လယ်တီကန်ပတ်လည် သာယာလှပရေးနှင့်တည်ဆောက်ရေးလုပ်ငန်းများ ဆောင်ရွက်နေသည့် လုပ်ငန်းခွင်သို့ ရောက်ရှိကြသည်။

ဦးစွာ တိုင်းဒေသကြီး စည်ပင်သာယာရေးအဖွဲ့မှ ညွှန်ကြားရေးမှူး ဦးသစ်ထူးမြင့်က လယ်တီကန်ပတ်လည်ဖွံ့ဖြိုးတိုးတက်ရေးလုပ်ငန်းများဖြစ်သည့် ကန်ပတ်လမ်းနိုင်လွန်ကတ္တရာ ခင်းခြင်းလုပ်ငန်းများ၊ ပန်းအလှပင်များစိုက်ပျိုးပြီးစီးမှုနှင့် ဆက်လက်စိုက်ပျိုးသွားမည့် အခြေ အနေများ၊ အပန်းဖြေထိုင်ခုံများထားရှိမည့်နေရာများ၊ ကန်ပတ်လမ်းနှင့် ကျောက်ရိုးစီတာဘောင် နှင့်စတီးလက်ရန်းများတပ်ဆင်သွားမည့် လုပ်ငန်းအခြေအနေများနှင့် ပတ်သက်၍ ရှင်းလင်းတင် ပြသည်။

ယင်းနောက် တိုင်းဒေသကြီး ဝန်ကြီးချုပ်က မြို့နေပြည်သူများ အားလပ်ရက်များတွင် စိတ်အေးချမ်းသာစွာဖြင့် အပန်းဖြေနိုင်ရေးနှင့် ကိုယ်လက်လှုပ်ရှား ကျန်းမာရေးလေ့ကျင့်ခန်း များဆောင်ရွက်နိုင်ရန်အတွက် သက်မှတ်ကာလတွင် တည်ဆောက်ရေးလုပ်ငန်းများ စံချိန်စံ ညွှန်းမီ အရည်အသွေးကောင်းမွန်စွာဖြင့် တည်ဆောက်ပြီးစီးရေး၊ ကန်ပတ်ဝန်းကျင်အား အမြဲ သန့်ရှင်းသပ်ရပ်ရေးတို့အတွက် တာဝန်ရှိသူများက အလေးထားဆောင်ရွက်သွားကြရန်နှင့် လုပ် ငန်းခွင်အန္တရာယ်ကင်းရှင်းရေး၊ လုပ်ငန်းများဆောင်ရွက်ရာတွင် လုံခြုံရေးအသိ၊သတိတို့ဖြင့် ဆောင်ရွက်သွားရေးတို့အား မှာကြားကာ ရှင်းလင်းတင်ပြချက်များအပေါ် လိုအပ်သည်များကို တာဝန်ရှိသူများနှင့် ဖြည့်ဆည်းပေါင်းစပ် ဆောင်ရွက်ပေးခဲ့သည်။

ဆက်လက်ပြီ တိုင်းဒေသကြီး ဝန်ကြီးချုပ်နှင့် တာဝန်ရှိသူများက လယ်တီကန်ပတ်လည် အား တပေဘူတ၊ စင်္ကာပူချယ်ရီ၊ ငုဝါ၊ ကျူးလစ်ပန်းအလှပင်များ စိုက်ပျိုးနေမှုများအား လိုက် လံကြည့်ရှု စစ်ဆေးခဲ့ကြသည်။

ထို့နောက် တိုင်းဒေသကြီး ဝန်ကြီးချုပ်နှင့် တာဝန်ရှိသူများသည် မုံရွာမြို့၊ အောင်မင်္ဂလာ ရပ်ကွက်ရှိ သုတရာမလမ်း အရှည် - ၁၉၁၀ ပေအား အကျယ် - ၁၆ ပေ၊ ၃ လက်မခွဲထု နိုင်လွန် ကတ္တရာလမ်းခင်းခြင်း လုပ်ငန်းခွင်သို့ရောက်ရှိရာ တိုင်းဒေသကြီး စည်ပင်သာယာရေးအဖွဲ့မှ ညွှန်ကြားရေးမှူးက မုံရွာမြို့အတွင်း နိုင်လွန်ကတ္တရာလမ်းများခင်းခြင်း လုပ်ငန်းများ ဆောင် ရွက်ပြီးစီးမှုများနှင့် အောင်မင်္ဂလာရပ်ကွက်ရှိ သုတရာမလမ်း နိုင်လွန်ကတ္တရာလမ်း ခင်းခြင်း လုပ်ငန်းများဆောင်ရွက်နေမှုတို့အား ရှင်းလင်းတင်ပြသည်။

ထို့နောက် တိုင်းဒေသကြီး ဝန်ကြီးချုပ်က ရှင်းလင်းတင်ပြချက်များအပေါ် လိုအပ်သည် များကိုတာဝန်ရှိသူများနှင့် ဖြည့်ဆည်းပေါင်းစပ် ဆောင်ရွက်ပေးခဲ့ပြီး နိုင်လွန်ကတ္တရာခင်း ခြင်းလုပ်ငန်းများဆောင်ရွက်နေမှုများအား လိုက်လံကြည့်ရှုစစ်ဆေးပြီး ရပ်ကွက်နေပြည်သူများ အား ရင်းရင်းနှီးနှီးနှတ်ဆက်ခဲ့ကြောင်း သိရသည်။